Transportonte drogë në bunker të kamufluar në automjet, arrestohet nga antidroga e Policisë

Një person është arrestuar sot në rrugën Prizren-Prishtinë, pasi është kapur duke transportuar drogë në një bunker të kamufluar në automjet-furgon.
Policia ka informuar se pesha e marihuanës së sekuestruar ka rezultuar të jetë tetë kilogramë e 740 gramë.
“Me datën 05.09.2022 rreth orës 10:00, hetuesit e Sektorit qendror të antidrogës në Prishtinë pas një pune hetimore dhe punës operative në teren kanë arritur deri tek informacionet relevante, ku dyshohej se një person është në posedim, gjegjësishtë është duke bërë transportimin e një sasie të substances narkotike të llojit “Marihuanë” me automjet. Menjëherë janë ndërmarr veprime të nevojshme dhe personi i dyshuar shtetas shqiptar është takuar në rrugën Prizren-Prishtinë, në afërsi të Komoranit me automjetin-kombi (furgon) Mercedes ngjyrë të bardhë. Njësitet policore dhe ato të antidrogës në bashkërendim, konkretisht NjKA (Njësia e Kontrollit të Autostradës) ka ndaluar automjetin e lartcekur kombi (furgon) afër rrethit të autostradës në hyrje të Fushë Kosovës. Është kryer kontrolla fillestare nga zyrtarët e trafikut dhe pas dyshimeve të ngritura është bërë një kontrollë më e detajuar nga hetuesit e Sektorit qendror të antidrogës ku është arritur të zbulohet një bunker (vend i kamufluar për narkotikë) në pjesën e prapme të ulëseve, ku në brendi të saj (bunkerit) kishte narkotikë të dyshuar të llojit Marihuanë. Me urdhër të prokurorit, automjeti-kombi (furgon) është dërguar për kontrollë më të detajuar nga njësitet kompetente të Policisë së Kosovës, dhe nga bunkeri janë nxjerr dhe sekuestruar dymbëdhjetë (12) paketime të plastikës me substancë të dyshuar narkotike të llojit Marihuanë.”, ka bërë të ditur Policia.
Policia ka informuar se si dëshmi nga i dyshuari janë sekuestruar: 60.450 Lekë Shqiptar, 329 euro, 250 funta të Anglisë si dhe dy telefona celuar Nokia me sim kartelë të Kosovës, kurse një Iphone me sim kartelë të Shqipërisë.
I dyshuari është arrestuar dhe me urdhër të prokurorit pas intervistimit nga hetuesit e antidrogës është ndaluar për 48 orë për procedura të mëtejme./21Media