​Prokuroria ngre aktakuzë për mashtrim në ndërtimin e lapidarit në Samadraxhë

Prokuroria Themelore në Prizren ka ngritur aktakuzë ndaj B.B. dhe A.M. nën dyshimin për keqpërdorim të pozitës zyrtare dhe mashtrim në prokurim publik, lidhur me projektin për ndërtimin e lapidarit për viktimat e viteve 1912–1945 në fshatin Samadraxhë të Suharekës.

Sipas aktakuzës, B.B., në cilësinë e drejtorit të Kulturës, Rinisë dhe Sportit në Komunën e Suharekës dhe menaxherit të kontratës, dyshohet se ka tejkaluar kompetencat e tij duke autorizuar një pagesë prej 5 mijë eurosh për operatorin ekonomik “A.G.” Sh.P.K., ndonëse punimet nuk ishin realizuar sipas kontratës dhe nuk ishte paraqitur kërkesë për kolaudim apo ndryshim të punimeve.

Prokuroria thekson se, si pasojë e këtyre veprimeve, Komunës së Suharekës i është shkaktuar dëm material prej 5 mijë eurosh, i konfirmuar edhe përmes ekspertizës së ndërtimtarisë.

Në të njëjtën aktakuzë, A.M., person përgjegjës i operatorit ekonomik “A.G.” Sh.P.K., akuzohet se ka pranuar pagesën prej 5 mijë eurosh, megjithëse punimet e kontraktuara nuk ishin realizuar sipas specifikimeve teknike, duke përfituar në mënyrë të kundërligjshme mjete publike.

Prokurori i rastit i ka propozuar Gjykatës që, pas zhvillimit të shqyrtimit gjyqësor dhe administrimit të provave, të akuzuarit të shpallen fajtorë dhe të dënohen sipas ligjit.