​Përgatitje intensive për Dardanët, ndërpritet stërvitja për një lojtar

Kombëtarja e Kosovës në futboll po vazhdon përgatitjet me intensitet maksimal në prag të dy ndeshjeve miqësore kundër Çekisë dhe Andorrës.

“Dardanët” kanë zhvilluar sot seancën e dytë stërvitore, e cila u karakterizua me ritëm të lartë dhe përkushtim të madh nga ana e futbollistëve. Përzgjedhësi Franco Foda u fokusua kryesisht në aspektin taktik dhe organizimin e lojës, duke synuar që skuadra të jetë sa më e përgatitur për sfidat e radhës.

Megjithatë, gjatë stërvitjes ka pasur edhe një shqetësim. Futbollisti Andi Hoti u detyrua ta ndërpresë seancën para kohe për shkak të një lëndimi në nyje. Ai do t’u nënshtrohet ekzaminimeve nga stafi mjekësor i Kombëtares, për të përcaktuar shkallën e lëndimit dhe kohën e rikuperimit.

Kosova pritet që në ditët në vijim të intensifikojë përgatitjet, me synimin për të paraqitur formë sa më të mirë në përballjet miqësore.

Ndeshjen miqësore Kosova do ta zhvillojë kundër Andorrës, më 7 qershor, në stadiumin “Fadil Vokrri”, nga ora 20:00.