Moti i ligë e dëborë në Britani, mbyllen mbi 200 shkolla

Britania është pushtuar nga mot i ligë me reshje të dendura dëbore. Ekspertët paralajmërojnë se moti do të vazhdojë të jetë i tillë edhe në ditët në vijim.

Sipas medieve të huaja, më shumë se 200 shkolla janë mbyllur në Britani. Shërbimi Meteorologjik i qeverisë ka lëshuar katër paralajmërime të verdha për borë, ngrica dhe trafik rrugor, devijime të rrugëve dhe ndërprerje të pritshme të energjisë elektrike.

Një nga paralajmërimet mbulon Uellsin jugor, paralajmërimi do të jetë në fuqi deri në mesnatën e së martës, ndërsa një tjetër paralajmërim është dhënë për Skocinë jugore deri në orën 10 të mëngjesit të së mërkurës. Paralajmërimi i tretë, i cili do të jetë në fuqi deri në mesditë të së mërkurës, ka të bëjë me Skocinë dhe lindjen e Anglisë.

Ekziston gjithashtu një paralajmërim i mëtejshëm për zonën e Irlandës së Veriut deri në orën 10 të mëngjesit të së mërkurës. Lartësia e borës pritet të jetë 10 centimetra në zonat që do të preken më shumë nga moti i keq. Termometri natën e së hënës tregoi temperatura nën zero në pjesën më të madhe të Britanisë, me rekordin e ulët të vendosur në Aberdeenshire që tregoi -11.2 gradë celcius.