“Do të përshkallëzojë luftën në gjithë rajonin”: BE kundër përfshirjes ushtarake të SHBA-së në konfliktin Izrael-Iran

Përfaqësuesja e Lartë e Bashkimit Evropian, Kaja Kallas, ka paralajmëruar se një përfshirje ushtarake e Shteteve të Bashkuara në përshkallëzimin mes Izraelit dhe Iranit do të “tërhiqte” gjithë Lindjen e Mesme në një konflikt më të gjerë dhe më të rrezikshëm.

Deklarata e saj erdhi pasi Donald Trump sugjeroi hapur se SHBA-ja, si aleate e ngushtë e Izraelit, mund të marrë një rol më aktiv për t’i dhënë fund armiqësive.

“Ne nuk jemi të përfshirë në këtë. Është e mundur që të përfshihemi. Por për momentin nuk jemi të përfshirë”, tha Trump për ABC News të dielën.

Më pas shtoi se SHBA-ja do të vepronte me “duart e lira” nëse Irani “prek trupat tona”.

Dhe të martën, Kallas e bëri të qartë se Bashkimi Evropian nuk do të mbështesë një ndërhyrje të armatosur amerikane.

“Nëse SHBA-të përfshihen, atëherë kjo me siguri do ta tërheqë gjithë rajonin në një konflikt më të gjerë. Dhe kjo nuk është në interesin e askujt”, citohet të ketë thënë ajo në Bruksel.