Çfarë përmban paketa e re e ndihmës ushtarake e SHBA-së për Ukrainën?

Presidenti i SHBA-së Joe Biden i tha të mërkurën presidentit ukrainas Volodymyr Zelensky se SHBA po i dërgonte kombit të tij armë, municione dhe ndihmë të tjera sigurie në vlerë prej 800 milionë dollarësh.
Kjo vjen pasi zyrtarët amerikanë paralajmëruan për një fazë të re potencialisht të përgjakshme në luftën në vazhdim, e përqendruar në rajonet lindore të Ukrainës ndërsa Rusia tërheq trupat e saj nga zona përreth kryeqytetit Kiev.
“Ushtria ukrainase ka përdorur armët që ne ofrojmë me efekt shkatërrues. Ndërsa Rusia përgatitet të intensifikojë sulmin e saj në rajonin e Donbasit, Shtetet e Bashkuara do të vazhdojnë t’i ofrojnë Ukrainës aftësitë për t’u mbrojtur”, ka thënë Biden në një deklaratë.
Biden detajoi njoftimin e ri në një telefonatë mesdite me Zelenskyn që zgjati për rreth një orë.
Sipas Pentagonit, SHBA po i siguron Ukrainës:
11 helikopterë Mi-17
300 drone Switchblade
18 Howitzer dhe pajisje mbrojtëse për t’u mbrojtur nga sulmet kimike
200 transportues personeli të blinduar M113
10 radarë kundër artilerisë
500 raketa antitank Javelin
30,000 komplete parzmore dhe helmeta
Sekretari i shtypit i Pentagonit, John Kirby ka thënë se paketa prej 800 milionë dollarësh kishte për qëllim “për të përmbushur nevojat urgjente të Ukrainës për luftën e sotme”, pasi forcat ruse zhvendosin fokusin e sulmit të tyre në Ukrainën lindore dhe jugore.
Ai shtoi se armët do të fillonin të dërgoheshin në Ukrainë “sa më shpejt të jetë e mundur”, duke vënë në dukje se ndihma e mëparshme e sigurisë ishte dërguar brenda katër deri në pesë ditë pas miratimit të paketave të sigurisë.
Që nga e marta mbrëma, dy burime thanë se helikopterët ishin hequr nga lista e ndihmës, megjithëse Biden tha në deklaratën e tij se ata përfundimisht ishin përfshirë.
Ukraina fillimisht i kishte kërkuar Shtëpisë së Bardhë në minutën e fundit që të mos dërgonte helikopterët, duke treguar se kërkonin më shumë kohë për të vlerësuar nëse do të ishin të dobishëm.
Por, gjatë bisedës telefonike të së mërkurës, Zelensky i tha Bidenit se vendi i tij kishte nevojë për to, kështu që ata u kthyen në paketë, tha një burim i njohur me çështjen.
Helikopterët Mi-17 që iu shtuan paketës ishin caktuar për Afganistanin, tha Kirby.
Dërgesa prej 800 milionë dollarësh e çon  shumën totale të ndihmës ushtarake që SHBA-ja i ka ofruar Ukrainës në më shumë se 3 miliardë dollarë.
Buxheti i mbrojtjes i Ukrainës për vitin 2020 ishte vetëm rreth 6 miliardë dollarë, sipas Institutit Ndërkombëtar të Kërkimit të Paqes në Stokholm.
Në më pak se dy muaj, SHBA-ja ka dhënë gati gjysmën e asaj në ndihmë të sigurisë, duke nënvizuar ritmin me të cilin Shtëpia e Bardhë ka punuar për dërgimin e armatimit dhe pajisjeve./21Media