A është zgjidhur problemi më i madh dimëror i veturave elektrike?

Problemet e dimrit për pronarët e veturave elektrike së shpejti mund të jenë një gjë e së kaluarës.

Inxhinierët në Universitetin e Miçiganit (UM) kanë zhvilluar një teknologji të re, që mundëson karikim dukshëm më të shpejtë dhe rreze më të gjatë të baterisë edhe në temperatura nën zero.

Moti i ftohtë ka qenë prej kohësh një sfidë për industrinë e veturave elektrike – bateritë ngarkohen më ngadalë, humbin kapacitetin dhe performanca e automjeteve bie.

E gjithë kjo kontribuon më tej në mosbesimin e shoferëve për kalimin në modele elektrike, veçanërisht në rajonet me dimër të ashpër, por siç thotë ekipi i UM, ndoshta zgjidhja është e thjeshtë: “vendosni një pallto në bateri”.

Pjesa kryesore e kësaj risie është një shtresë mbrojtëse ultra e hollë me trashësi vetëm 20 nanometra, e bërë nga karbonat litium borat.

Kjo shtresë parandalon formimin e depozitave të litiumit në sipërfaqen e anodës, të cilat përndryshe ngadalësojnë karikimin, zvogëlojnë kapacitetin dhe përbëjnë një rrezik sigurie.

Kombinuar me një elektrodë të ristrukturuar, të bërë duke përdorur një model laser që rrit efikasitetin, rezultatet janë mbresëlënëse: bateritë mund të karikohen deri në pesë herë më shpejt, në temperatura deri në  minus 10 gradë celsius dhe të ruajnë deri në 97% të kapacitetit të tyre pas 100 karikimesh të shpejta.

Kjo do të thotë se ngarkimi mesatar i veturës elektrike mund të zgjasë më pak se 10 minuta – vetëm koha që duhet për të pirë një kafe në pikën e karburantit, shkruan The Drive.

Më e rëndësishmja, teknologjia e re nuk kërkon një revolucion në proceset e prodhimit. Prodhuesit e baterive mund ta zbatojnë atë pa ndryshime të mëdha në fabrikat ekzistuese, pohon një nga autorët e studimit.

Kjo heq një nga pengesat më të mëdha për adoptimin e gjerë – nevojën për modifikime të shtrenjta dhe që kërkojnë kohë në linjat e prodhimit.

Edhe pse modelet elektrike kanë bërë përparim të madh në rreze dhe kohë karikimi në dekadën e fundit, temperaturat e dimrit mbeten ende një sfidë serioze për shumicën e përdoruesve – shoferët shpesh detyrohen të fikin ngrohjen ose të përdorin truke të ndryshme për të marrë “disa kilometra më shumë”.

Teknologjia e re e baterive nga UM, megjithatë, duket se mund të sjellë një ndryshim të vërtetë, pa pasur nevojë të rishpik të gjithë konceptin e veturës elektrike nga e para.