Miratohet zhvillimi i projektit “Autostrada Istog-Peje-Deçan-Gjakovë – Prizren”
Komiteti drejtues ndërministror për zhvillimin e projektit “Autostrada Istog-Peje-Deçan-Gjakovë – Prizren”, ka shqyrtuar dhe miratuar propozimin për variantin final të këtij projekti.
Përzgjedhja e këtij varianti të Autostradës së Dukagjinit, vjen pas dëgjimeve publike të realizuara me qytetarët e të gjitha komunave që i përshkon ky projekt.
Ministri i Infrastrukturës dhe Transportit Pal Lekaj, kryesues i këtij komiteti, ka theksuar rëndësinë e këtij vendimi i cili sipas tij hapë rrugë projektimit të detajuar. Mes të tjerash ka shtuar se më këtë autostradë, Kosovës i hapet perspektivë më e madhe me krijimin e lidhjeve me korridoret pan evropiane.
Anëtarët e komitetit kanë diskutuar edhe për të tjera aspekte të ecurisë së realizimit të këtij projekti, ndërsa janë shprehur të kënaqur me procesin e deritanishëm.
Autostrada pritet të fillojë në vjeshtë të këtij viti dhe të përfundojë në vitin 2024. Llogaritet të jetë ndër autostradat më të gjata në territorin e Kosovës, me 91 kilometra. Kjo autostradë do t’i kushtojë buxhetit të Kosovës mbi 1 miliard euro! /21Media
