Delegacioni i Kosovës dhe Serbisë vazhdojnë sot takimin në Uashington, ku pritet të nënshkruhet edhe marrëveshja për bashkëpunim ekonomik.
Takimi do të fillojë në ora 10:00(sipas kohës në Washington), ku pjesë e këtij takimi pritet të jetë edhe presidenti amerikan, Donald Trump.
Kryeministri i Kosovës, Avdullah Hoti pas takimit të 3 shtatorit, ka deklaruar se kanë bërë një hap të madh drejt përmbylljes së marrëveshjes finale.
Përfaqësues të mediave shqiptare që janë në Uashington, thonë se dy delegacioneve iu është ofruar një draft i marrëveshjes përfundimtare dhe pastaj janë tërhequr nga ndërmjetësit në mënyrë që mos të dal në media.
Kurse, presidenti i Serbisë, Aleksandar Vuçiq, ka thënë se në atë draft marrëveshje nuk kishte asgjë të re, duke shtuar se njohja e shtetit të Kosovës nuk është më temë.
Nikoqirë të takimit të 3 shtatorit në Uashington ishte këshilltari për Siguri Kombëtare i Shtëpisë së Bardhë, Robert O’Brien dhe i dërguari i Posaçëm i presidentit amerikan për dialogun Kosovë-Serbi, Richard Grenell.
Tri ditë pas takimit në Uashington, më 7 shtator, delegacionet e larta të Kosovës dhe Serbisë kanë një takim në Bruksel për vazhdimin e dialogut./21Media
