Krasniqi pas dënimit të Shalës: Drejtësia dhe e vërteta, do të triumfojnë herët a vonë
Kryetari i PDK-së , Memli Krasniqi reagoi pas vendimit të Gjykatës Speciale për dënimin e Pjetër Shalës me 18 vite burg.
Ai tha ky vendim është vazhdimësi e verdikteve drakoniane ndaj çlirimtarëve të Kosovës.
“Lufta e UÇK-së është pjesa më e lavdishme e historisë së Kosovës, të cilën askush dhe asgjë nuk mund ta ndryshojë e ta rishkruajë
Ndonëse të indinjuar me këtë verdikt, drejtësisë i kemi besuar gjithmonë, andaj besojmë edhe sot se drejtësia dhe e vërteta, do të triumfojnë herët a vonë”, shkroi Krasniqi.
Ish-pjesëtari i Ushtrisë Çlirimtare të Kosovës, Pjetër Shala u shpall fajtor dhe u dënua me 18 vjet burgim nga trupi gjykues i Gjykatës Speciale.
Ai është shpallur fajtor për ndalim arbitrar dhe torturë kundër së paku 18 personave dhe në pikën e vrasjes së paligjshme kundër një personi, më ose rreth datës 5 qershor 1999, në fabrikën e metalit në Kukës.
Gjykata ka thënë se akuza e trajtimit mizor është mbuluar tërësisht nga ajo e torturës dhe nuk është shqyrtuar më tej nga Gjykata.
Prokuroria ka kërkuar dënim prej 28 vjetësh për Shalën./21Media
