Gjykata Speciale e Hagës ua ka vazhduar masën e paraburgimit ish-komandantit të UÇK-së Haxhi Shala dhe ish-pjesëtarit Sabit Jonuzi.
Kjo u bë e ditur sot në një konferencë për media nga zëdhënësi i Dhomave të Specializuara të Kosovës, Michael Doyle, sipas të cilit gjykatësi ka marrë vendimin më 8 prill.
“Ai konstatoi për të dy të akuzuarit se ekziston ende rreziku i arratisjes, pengimit të procesit gjyqësor dhe rreziku i kryerjes së krimeve të tjera, veçanërisht duke mbajtur parasysh se me ecurinë e procesit të nxjerrjes së materialeve, të akuzuarit kanë më shumë qasje në informacione të ndjeshme”, tha ai.
Sipas tij, në çështjen Januzi, Bahtijari dhe Shala, kryetarja e Dhomave të Specializuara Ekaterina Trendafilova më 5 prill caktoi Panelin e Gjykatës Kushtetuese për të vendosur lidhur me kërkesën referuese të të akuzuarve me të cilën kundërshtojnë ndryshimet në rregulloren e ndihmës juridike nga Zyra Administrative.
Paneli i Gjykatës Kushtetuese përbëhet nga gjykatësit Vidar Stensland, Rumen Nenkov dhe Romina Inkuti.
Aktakuza kundër Januzit dhe Bahtijarit është konfirmuar më 2 tetor 2023 dhe është bërë publike më 6 tetor 2023. Aktakuza kundër Haxhi Shalës është konfirmuar më 4 dhjetor 2023 dhe u bë publike më 12 dhjetor 2023.
Më 12 janar 2024, pas kërkesës së saj për bashkimin e këtyre dy rasteve, PSP-ja ngriti propozim-akuzë të përbashkët, por gjyqtari i procedurës paraprake më 8 shkurt 2024 urdhëroi PSP-në që ta riparaqiste atë. Në ndërkohë, çështja e përbashkët do të vazhdojë në bazë të aktakuzave të konfirmuara aktualisht në të dy rastet, përkatësisht aktakuzën e konfirmuar më 2 tetor 2023 për rastin Januzi-Bahtijari dhe aktakuzën e konfirmuar më 4 dhjetor 2023 për rastin Haxhi Shala.
