Qindra njerëz dyshohet se kanë vdekur dhe të paktën 1000 janë lënduar pas një tërmeti të fuqishëm që goditi Afganistanin perëndimor, afër kufirit iranian.
Tërmeti me magnitudë 6.3 goditi rreth 40 km nga qyteti perëndimor i Heratit rreth orës 11:00 me kohën lokale, raporton BBC, përcjell portali rtv21.tv
Shumë ndërtesa u dëmtuan, duke bllokuar njerëzit nën rrënoja dhe pati të paktën tre pasgoditje të fuqishme.
Të mbijetuarit e përshkruan tmerrin e tyre teksa ndërtesat e zyrave fillimisht u tronditën – dhe më pas u shembën rreth tyre.
“Ishim në zyrat tona dhe papritmas ndërtesa filloi të dridhej. Suvaja e mureve filloi të binte dhe muret u plasaritën, disa mure dhe pjesë të ndërtesës u shembën.” Banori i Heratit Bashir Ahmad tha për agjencinë e lajmeve AFP.
“Unë nuk jam në gjendje të kontaktoj familjen time, lidhjet në rrjet janë shkëputur. Jam shumë i shqetësuar dhe i frikësuar, ishte e tmerrshme,” shtoi ai.
Shefi i menaxhimit të fatkeqësive të provincës Mosa Ashari u tha gazetarëve: “Deri më tani më shumë se 1,000 gra, fëmijë dhe qytetarë të moshuar janë përfshirë në të dhënat tona dhe rreth 120 njerëz kanë humbur jetën.”
Raportet e hershme e vlerësuan numrin e konfirmuar në 15, por kjo kishte gjithmonë gjasa të rritej pasi punonjësit e urgjencës të konfirmonin shkallën e plotë të shkatërrimit të gjerë. Raportet e pakonfirmuara thonë se numri aktual është më shumë se 300./21Media
