Gjykata më e lartë zgjedhore e Brazilit e ka ndaluar ish-presidentin Jair Bolsonaro të kandidojë për poste politike deri në vitin 2030, pasi e shpalli atë fajtor për shpërdorim të pushtetit dhe keqpërdorim të medias publike gjatë fushatës zgjedhore të vitit të kaluar.
Pesë nga shtatë gjyqtarë e shpallën fajtor ish-presidentin, duke i dhënë fund çdo shprese për një rikthim politik në zgjedhjet e ardhshme të 2026-ës. Dy nga gjyqtarët votuan kundër vendimit, i cili e pengon Bolsonaron të kandidojë për poste publike për tetë vjet.
Rasti rrjedh nga një takim i Bolsonaros me ambasadorët e huaj në korrik 2022, në të cilin ai përhapi informacione të rreme për sistemin zgjedhor të Brazilit dhe vuri në pikëpyetje besueshmërinë e tij përpara zgjedhjeve fraksionale të vitit të kaluar. Takimi u transmetua drejtpërdrejt nga kanalet televizive zyrtare dhe në YouTube.
YouTube hoqi transmetimin e drejtpërdrejtë të ngjarjes për mospërputhje me politikat e tyre të lajmeve të rreme.
Bolsonaro ka mohuar çdo keqbërje. Ai tha se kishte në plan të apelonte vendimin e gjykatës, shkruan CNN, përcjell rtv21.tv.
Politikani i ekstremit të djathtë humbi zgjedhjet me diferencën më të ngushtë në dekada ndaj presidentit aktual Luiz Inácio Lula da Silva.
Gjatë takimit me ambasadorët, ish-presidenti dyshohet se tha se zgjedhjet e vitit 2022 mund të rrezikoheshin për shkak të mashtrimit.
Pretendime të tilla për gabime në sistemin zgjedhor janë mohuar të gjitha nga autoritetet zgjedhore të Brazilit. /21Media
