Kurti mirëpriti Drejtorin e BERZh-it për Ballkanin Perëndimor, Matteo Colangeli

Kryeministri i Kosovës, Albin Kurti, u takua sot me Drejtorin për Ballkanin Perëndimor të Bankës Evropiane për Rindërtim dhe Zhvillim (BERZh), Matteo Colangeli, si dhe Drejtorin e BERZh për Kosovë, Sergiy Maslichenko. Në këtë takim, ai shoqërohej nga Ministri i Financave, Punës dhe Transfereve, Hekuran Murati.

Gjatë këtij takimi, palët  theksuan rëndësinë e lehtësimit të planifikimit, financimit dhe zbatimit të projekteve infrastrukturore, përfshirë këtu edhe parqet industriale që mundësojnë tërheqjen e investimeve dhe zhvillimin e bizneseve në Kosovë.

Ky takim shënon një hap të rëndësishëm drejt forcimit të bashkëpunimit mes Kosovës dhe BERZh-it, duke synuar avancimin e projekteve strategjike që do të kontribuojnë në zhvillimin ekonomik të vendit dhe krijimin e mundësive të reja për bizneset vendase dhe ndërkombëtare.

Kryeministri Kurti i falënderoi përfaqësuesit e BERZh-it për takimin dhe bashkëbisedimin e frytshëm, duke shprehur gatishmërinë e vullnetin për thellim të mëtejmë të bashkëpunimit.