Marsh në mbështetje të të mbijetuarve të dhunës seksuale gjatë luftës në Kosovë

(Lajm i përditësuar)

​Haxhiu: Do të finalizojmë strategjinë për drejtësi tranzicionale

Me moton “Të rinjtë mbështesin viktimat e dhunës seksuale”, është shënuar dita e të mbijetuarve të dhunës seksuale në Kosovë.

Shënimi i kësaj dite ka filluar me një marsh në qendër të Prishtinës ku kanë marrë pjesë edhe përfaqësues të institucioneve.

E mbijetuara, Vasfije Krasniqi, synon që këtë ditë ta shndërrojë në forcë për të gjitha viktimat.

“Me ditën e sotme unë këtë ditë dua ta shndërroj në forcë e kurajë, tu jap forcë viktimave që zëri jonë të dëgjohet në tërë botën”, ka thënë Krasniqi.

Në marsh ka marrë pjesë edhe Shyrete Tahiri Sulimani, një tjetër e mbijetuar e dhunës seksuale.

“Jam shumë krenare që shoh shumë të rinj e të reja këtu sot. E di që këta do të luftojnë çdo herë për neve, e nuk do të lënë qe me u harrua”, ka thënë ajo.

Ndërsa ministrja e Drejtësisë, Albulena Haxhiu, ka thënë se së shpejti do të finalizohet strategjia për drejtësinë tranzicionale.

“Jemi bashkë e që bashkërisht ta ngrisim vetëdijen e shoqërisë për tmerrin që viktimat kanë përjetuar. Lufta në Kosovë pati pasoja të rënda. Mijëra gra dhe vajza, përfshirë edhe burra u dhunuan nga kriminelët e luftës. Përkujtojmë këtë ditë, do të njohim ndikimin e vazhdueshëm që krimet kanë tek viktimat. Si Ministri e Drejtësisë do të finalizojmë strategjinë për drejtësi tranzicionale”, ka thënë Haxhiu.

Zyrtarizmi i 14 prillit si Ditë e të mbijetuarve të dhunës seksuale nga koha e luftës, është bërë në mbledhjen e mbajtur ditë më parë nga Qeveria e Kosovës, me kërkesë të presidentes së vendit, Vjosa Osmani.

Osmani kishte theksuar se ky vendim do t’i kontribuojë ruajtjes së memories kolektive, ndërsa ka përmendur nevojën e solidarizimit me të mbijetuarit e dhunës seksuale.

Marsh në mbështetje të të mbijetuarve të dhunës seksuale gjatë luftës në Kosovë

Ka nisur marshi në mbështetje të të dhunuarve seksualisht gjatë luftës së fundit në Kosovë.

Marshit po i prijnë dy të mbijetuarat, Vasfije Krasniqi dhe Shyrete Sulimani, si dhe ministrja e Drejtësisë, Albulena Haxhiu, dhe drejtoresha e Qendrës Rehabilituese për të Mbijetuarit e Torturës, Feride Rushiti.

Në përfundim të marshit do të prezantohet edhe instalacioni “14 Prilli”, ditë kjo që tani zyrtarisht njihet si Dita e të mbijetuarve të dhunës seksuale nga koha e luftës.

Zyrtarizmi i 14 prillit si Ditë e të mbijetuarve të dhunës seksuale nga koha e luftës, është bërë në mbledhjen e mbajtur ditë më parë nga Qeveria e Kosovës, me kërkesë të presidentes së vendit, Vjosa Osmani.

Osmani kishte theksuar se ky vendim do t’i kontribuojë ruajtjes së memories kolektive, ndërsa ka përmendur nevojën e solidarizimit me të mbijetuarit e dhunës seksuale.

​Haradinaj:Avancimi i vendit tonë është i pamundur pa trajtimin e plagëve të së kaluarës

Kryetari i Aleancës për Ardhmërinë e Kosovës(AAK), Ramush Haradinaj tha se avancimi i Kosovës është i pamundur pa trajtimin e plagëve të së kaluarës.

Ai shkroi  në shënim të Ditës së të Mbijetuarve të Dhunës Seksuale gjatë luftës së fundit në Kosovë dhe ka theksuar se në këtë ditë duhet reflektuar për ngritjen e vetëdijes dhe një angazhim më të madh.

“Në shënim të Ditës së të Mbijetuarve të Dhunës Seksuale gjatë luftës së fundit në Kosovë, të reflektojmë si institucione por edhe si shoqëri për ngritjen e vetëdijes për një angazhim më të madh, që personat me plagë të luftës ta fitojnë të drejtën e tyre – trajtimin dhe pozicionin e dinjitetshëm në shoqëri, por njëkohësisht që asnjëherë të mos ndihen vetëm në betejën për drejtësinë, të cilën ende nuk e kanë parë. Avancimi i vendit tonë është pothuajse i pamundur pa trajtimin e plagëve të së kaluarës”, ka shkruar Haradinaj në Facebook.

10: 05- Kurti nderon viktimat dhe të mbijetuarit e dhunës seksuale gjatë luftës

Në Ditën Memoriale të të mbijetuarve të dhunës seksuale gjatë luftës së fundit në Kosovë, të shpallur këtë vit nga Qeveria, Kryeministri i Republikës së Kosovës, Albin Kurti, nderoi viktimat dhe të mbijetuarit e dhunës seksuale gjatë luftës në Kosovë.

Me homazhe te memoriali Heroinat, Kryeministri Kurti përkujtoi viktimat e dhunës seksuale, të cilat nuk janë më në mesin tonë, si dhe nderoi të mbijetuarat e të mbijetuarit për forcën e tyre të pashembullt.

Kryeministri Kurti, së bashku me Ministren e Drejtësisë, Albulena Haxhiu, vendosi lule para memorialit, i cili përkujton mijëra gra dhe vajza, burra dhe djem, viktima e të mbijetuar të dhunës seksuale, që është përdorur si armë lufte nga forcat e okupatorit serb në luftën e fundit në Kosovë.

Në homazhe morën pjesë edhe Ministri i Punëve të Brendshme, Xhelal Sveçla, Ministrja e Ekonomisë, Artane Rizvanolli, Ministrja e Industrisë, Ndërmarrësisë dhe Tregtisë, Rozeta Hajdari, Ministri i Mjedisit, Planifikimit Hapësinor dhe Infrastrukturës, Liburn Aliu, drejtuesja e grupit parlamentar të Lëvizjes VETËVENDOSJE!, Mimoza Kusari Lila, Kryeshefja Ekzekutive e Agjencisë për Barazi Gjinore në Zyrën e Kryeministrit, Edi Gusia, kryetarja e Komisionit Qeveritar për Njohjen dhe Verifikimin e Statusit të personave të dhunuar gjatë Luftës në Kosovë, Leonora Selmani, si dhe përfaqësues të tjerë të institucioneve.

Në mbledhjen e 138-të, të mbajtur më 12 prill 2023, Qeveria e Republikës së Kosovës në bashkërendim me Presidenten e Republikës së Kosovës, ka shpallur datën 14 prill si Ditë Memoriale e të mbijetuarve të dhunës seksuale gjatë luftës së fundit në Kosovë.

Kosova shënon Ditën e të Mbijetuarve të Dhunës seksuale

Kosova shënon për herë të parë 14 Prillin – Ditën e të Mbijetuarve të Dhunës seksuale gjatë luftës së fundit në Kosovë, në shenjë solidarizimi me rreth 20.000 persona të cilët vlerësohen se kanë qenë viktima të dhunës seksuale pra 24 vjetësh.

Me propozim të presidentes Osmani, Qeveria e Kosovës ditë më parë e caktoi datën e sotme si ditë që do t’i dedikohet të mbijetuarve të dhunës seksuale gjatë luftës së fundit.

14 prilli përkon me datën famëkeqe të vitit 1999 atëherë kur Vasfije Kraniqi Goodman, në atë kohë 16 vjeçare, u rrëmbye nga një polic serb dhe u dërgua në fshatin Babimost, ku u dhunua seksualisht.

Shënimi i 14 Prillit si Ditë e të mbijetuarve, është vlerësuar si moment i rëndësishëm në dokumentimin e të vërtetës, njëkohësisht shënon edhe njohjen simbolike, e cila është e rëndësishme në integrimin e plotë të të mbijetuarve të dhunës seksuale nga koha e luftës.

Presidentja Osmani deklaroi se shënimi i 14 Prillit do t’i kontribuojë ruajtjes së memories kolektive, ndërsa ka përmendur nevojën e solidarizimit me të mbijetuarit e dhunës seksuale.

“Rikujtojmë se gjatë luftës së fundit në Kosovë, rreth 20.000 persona kanë qenë viktima të luftës seksuale. Jetët e të gjithë këtyre personave ndryshuan përgjithmonë. Pikërisht më 14 prill ndryshoi gjithmonë edhe jeta e Vasfije Krasniqit, e cila u rrëmbye me forcë dhe u dhunua nga forcat serbe. Ajo mori guximin që ta ndajë të vërtetën me tërë botën. Përmes rrëfimit të saj, ajo u shndërrua në zërin e të gjithë të mbijetuarve të dhunës seksuale gjatë luftës së fundit në Kosovë”, ka thënë ndër të tjera presidentja Osmani në propozimin drejtuar Qeverisës së Republikës së Kosovës që 14 Prilli të shënohet si Dita e të Mbijetuarve të Dhunës seksuale.

Në shënimin e kësaj dite, QKRMT dhe organizatat anëtare të platformës “Bëhu zëri im”, në bashkëpunim me Zyrën e Presidentes së Republikës së Kosovës, sot (e premte) do të organizojë marshin: Në mbështetje të të mbijetuarve të dhunës seksuale gjatë luftës në Kosovë.

Marshi do të fillojë në orën 12:00 nga sheshi Ibrahim Rugova, për të vazhduar deri tek monumenti Heroinat, ku do të prezantohet instilacioni “14 Prilli”.