Dy kosovarë u arrestuan në Serbi, deklarohet MPJD për RTV21

Ministria e Punëve të Jashtme dhe Diasporës të Kosovës (MPJD) është deklaruar pas raportimeve se dy kosovarë janë arrestuar në Serbi.

Në një përgjigje zyrtare për portalin rtv21.tv, MPJD thonë se i kanë dërguar kërkesë Qeverisë së Serbisë për të marrë detaje mbi këtë rast, përfshirë identitetin e personave të arrestuar dhe lokacionin ku ata janë duke u mbajtur.

Deri më tani, kjo ministri nuk ka pranuar ndonjë përgjigje.

“Në lidhje me këtë rast, Zyra Ndërlidhëse e Republikës së Kosovës në Serbi i ka dërguar tashmë Qeverisë së Serbisë, përmes Zyrës Ndërlidhëse të Serbisë në Kosovë, një kërkesë formale për ta konfirmuar rastin, si dhe për të ofruar detajet tjera relevante, përfshirë identitetin e personave të arrestuar dhe lokacionin ku ata janë duke u mbajtur”, thonë nga MPJD për rtv21.tv.

Lidhur me këtë, janë njoftuar edhe Delegacioni i Bashkimit Evropian në Serbi dhe misionet diplomatike të vendeve të Kuint-it të akredituara në Beograd.

Tutje, nga kjo ministri konfirmojnë se në momentin e konfirmimit, diplomatët e Zyrës Ndërlidhëse të Republikës së Kosovës në Serbi do të bëjnë kërkesë zyrtare për vizitën e tyre në qendrën e paraburgimit ku ata janë duke u mbajtur.

Siç u raportua të martën në media, dy persona dyshohet se u arrestuan në territorin serb gjatë kohës sa po prenin dru.

Po ashtu u raportua se ndaj tyre, autoritetet serbe e kanë caktuar masën e ndalimit prej 30 ditësh./21Media