Qeveria merr 23 vendime, investime në komuna dhe projekte publike

Kryeministri në detyrë, Albin Kurti, ka njoftuar për vendimet e marra sot në mbledhjen e 269-të të Qeverisë së Kosovës, ku u miratuan gjithsej 23 pika.

Sipas tij, ndër vendimet kryesore janë ato që lidhen me zhvillimin e komunave dhe investimet në projekte publike. Në mesin e tyre përfshihen: shpronësimi për ndërtimin e Qendrës për Sport dhe Kulturë në Ferizaj; objekte edukativo-arsimore dhe sportive në Prizren; fusha futbolli dhe hapësira rekreative në Gjakovë; rehabilitimi dhe asfaltimi i rrugës në Mushtisht, që lidh Suharekën me Shtërpcën; ndërtimi i rrugës Korishë–Kabash me dalje në rrugën rajonale.

Gjithashtu është finalizuar procesi i shpronësimit për ndërtesat e banimit social në Podujevë me 133 njësi, projektin “FLOWS” në Gjilan për furnizim të qëndrueshëm me ujë, si dhe për ndërtimin e qarkores së jashtme të këtij qyteti.

Qeveria ndau gjithashtu 2 milionë euro për subvencionimin e teksteve dhe materialeve mësimore për vitin shkollor 2025/26 dhe 3 milionë euro për rehabilitimin e rrugëve rajonale.