​Napoli i shkakton humbjen e parë Juventusit në Serie A

Zonja e Vjetër nga Torino ka pësuar humbjen e parë në edicionin e sivjetmë të elitës së futbollit italian në super-derbin ndaj Napolit të Amir Rrahmanit me rezultat 1:2.

“Bardh-e-zinjtë” në “Diego Armando Maradona” erdhën në epërsi me golin e Randal Kolo Munai në minutën e 43-të.

Napoli kishte rast të mirë barazimi, por goditja e belgut Romelu Lukaku në minutën e 50-të nuk përfundoi në rrjetë, pasi Michele Di Gregorio intervenoi për mrekulli duke dëbuar topin jashtë vijës fundore.

Megjithatë, napolitanët erdhën deri te barazimi me golin e kamerunasit Andre-Frank Zambo Anguissa në minutën e 57-të, pas asistimit të Matteo Politano, ndërsa Romelu Lukaku shënoi golin e fitores nga penalltia në minutën e 69-të, duke i shkaktuar kështu humbjen e parë Juventusit në këtë edicion të garave.

Në ndeshjen tjetër të ditës së sotme, skuadra Como 1907 si vendës pësoi nga Atalanta e Berat Gjimshtit me rezultat 1:2, ndërsa Empoli-Bologna do të luajnë sonte nga 20:45.

Nesër në program janë takimet Milan-Parma, Udinese-Roma, Lecce-Inter dhe Lazio-Fiorentina.

Xhiroja e 22-të e Serie A përmbyllet ditën e hënë me duelet Venezia-Hellas Verona, i cili njëherësh është derbi i skuadrave të rrezikuara për t’u larguar nga elita e futbollit italian. Skuadra tjetër, po ashtu e rrezikuar, Monza do të luajë si mysafire ndaj ekipit Genoa.

Napoli prin në tabelë me 53 pikë, prej tyre 17 fitore, dy barazime dhe tri humbje, pasojnë Inter me 47, Atalanta 46, Lazio 39, Juventus 37, Fiorentina e Bologna nga 33 pikë. Tri ekipet e fundit në renditje janë Verona 19, Venezia 15 dhe Monza 13