Konjufca në Prizren: Kriminelët duhet të ndëshkohen

Kryetari i Kuvendit, Glauk Konjufca sot bëri homazhe te lapidari i të rënëve në Lagjen e Trimave (ish-Tusus) në Prizren, ku para 22 vitesh forcat ushtarake, policore dhe paramilitare serbe kanë vrarë dhe masakruar 27 banorë të kësaj lagjeje.

Siç u informua nga Kuvendi, Konjufca tha se ishte në atë vend për të nderuar dhe për t’u përkulur para të gjithë atyre që kanë dhënë jetën për liri, duke përmendur Lagjen e Trimave si një shembull se si duhet rreshtuar në krah të luftës çlirimtare. Por, shtoi ai, ajo që brenë ndërgjegjen e të gjithëve për këto krime të kryera anekënd Kosovës nga regjimi i Serbisë, duke mos kursyer as gra e fëmijë, është fakti se ende nuk është dënuar askush.

“Ata që kanë kryer këtë masakër dihen me emër e mbiemër dhe vazhdojnë të jetojnë të lirë, pa marrë dënimin e merituar. Prandaj, është obligim i institucioneve të Kosovës dhe i secilit prej nesh që të bëjmë më shumë seç është bërë deri me tani. Të shpalosim identitetin e atyre që kanë kryer këto masakra dhe të bëjmë presion edhe te bashkësia ndërkombëtare për gjetjen e kapjen e tyre dhe të njëjtit të sillen para drejtësisë”, tha Konjufca.

Tutje, sipas komunikatës, Konjufca theksoi se tashmë edhe Kosova e ka mundësinë që t’i gjykojë kryerësit e krimeve edhe në mungesë, meqë tashmë ekziston edhe ligji.

“Ndryshimi i ligjit mundëson gjykimin në mungesë dhe nuk ka asnjë justifikim për të mos filluar këto procese për secilin që dihet me emër dhe mbiemër se ka urdhëruar apo ka qenë pjesëmarrës i shumë masakrave të kryera në Kosovë”, u shpreh ai.

Kreu i Kuvendit qëndroi edhe në shtëpitë e disa banorëve të kësaj lagjeje, familjarët e të cilëve janë vrarë në masakrën e 26 majit të vitit 1999. Me këtë rast, siç u bë e ditur, ai iu premtoi atyre angazhim institucional për ndëshkimin e kriminelëve./21Media