Haradinaj: Vëllezërit Gërvalla e Kadri Zeka, ishin vazhdimësi e përpjekjeve tona për liri

Kryetari i Aleancës për Ardhmërinë e Kosovës (AAK), Ramush Haradinaj, ka bërë homazhe tek varrezat e dëshmorëve në Gjilan si dhe në zbulimin e shtatores së heroit Kadri Zeka, në 42-vjetorin e rënies.

Haradinaj ka thënë se vëllezërit Jusuf e Bardhosh Gërvalla si dhe Kadri Zeka, ishin vazhdimësi e përpjekjeve për liri. 

“Vëllezërit Jusuf e Bardhosh Gërvalla dhe Kadri Zeka, ishin veprimtarët e hershëm të lëvizjes sonë kombëtare për liri e për pavarësi. Ata ishin vazhdimësi e përpjekjeve tona për çlirim dhe për të drejtën tonë të mohuar me dekada”. 

“Sot, në 42-vjetorin e rënies heroike, me kolegë bëmë homazhe tek varrezat e dëshmorëve në Gjilan, në kujtim e nderim të jetës dhe veprës së heroit Kadri Zeka”, ka thënë Haradinaj. 

Haradinaj ka marrë pjesë edhe në zbulimin e shtatores së heroit Kadri Zeka. 

“Po ashtu, Kadriu u shndërrua në bronz në mes qyteti prej ku i bënë roje Gjilanit të Mulla Idrizit e Idriz Seferit, të Agim Ramadanit e të shumë heronjve e dëshmorëve nga kjo trevë”, ka shtuar Haradinaj. 

Ai ka thënë se rruga drejt lirisë nuk u ndal asnjëherë.

“Dora e armikut ishte kudo në ndjekje të shqiptarëve, sepse armiku kishte kuptuar saktë se rreshtimi ynë në anën e drejtë të historisë ishte në rrugë të pakthyeshme, i vendosur dhe i drejtë, prandaj nuk kursente asgjë për ta ndalë e shuar përpjekjen tonë”.

“Rruga drejt lirisë nuk u ndal asnjëherë. Ishte nisur qysh herët, vazhdoi me Jusufin e Bardhoshin krah Kadriut, kulmoi me luftën tonë çlirimtare duke sjellë lirinë për Kosovën”, ka shtuar ai. 

“Lavdi të rënëve për liri në të gjitha etapat e historisë sonë të lavdishme!”, ka përfunduar Haradinaj.