AAK: Shtyllat kryesore të ekonomisë jofunksionale, qytetari po varfërohet çdo ditë e më shumë

Aleanca për Ardhmërinë e Kosovës(AAK) sot ka mbajtur konferencë për media ku kanë shpalosur shqetësimet e tyre për dy tema- për vendimin e fundit të Gjykatës Kushtetuese për Ligjin për Këshillin Prokurorial dhe për gjendjen e rëndë në ekonomi, krizën e madhe që sipas tyre po mbizotëron në institucionet bazë të ekomonisë, si në BQK dhe Trust – dhe vendimi i ZRrE për shtrenjtim të energjisë elektrike dhe i Ministrisë së Financave për rritje të tatimit në pronë.

Shefi i grupit parlamentar të AAK-së, Besnik Tahiri u shpreh se vendimi i Gjykatës Kushtetuese për Ligjin për Këshillin Prokurorial vërteton se anti-kushtetutshmëtia gjatë kësaj qeverisjeje është bërë e standard qeverisës. Ai shtoi se kundërshtimet ndaj vendimeve të Gjykatës Kushtetuese shpërfaqin qasjen autoritare si dhe tentimin për kapje të çdo institucioni të pavarur nga ana e njerëzve në pushtet.

Tutje, Tahiri tha se është e patolerueshme që për çdo vendim kushtetues të ketë qëndrime politike dhe njëkohësisht shtyjnë ligje të cilat kontestohen nga Komisioni i Venecias.

Fatmir Gashi, udhëheqës i Departmentit pët Ekonomi në AAK, foli rreth mungesës së emërimit të Bordit të Trustit, ku sipas tij, është e pakuptimtë në një situatë krize ekonomike tash e tre vite. Sipas Gashit, Qeveria e Kosovës do duhej që tanimë ta nisë reformën për fondin pensional.

“2 miliardë gjysmë euro të cilat menaxhohen nga Trusti Pensional janë pa mbikëqyrje. Kjo është një papërgjegjësi e madhe nga ana e Qeverisë. Nevojiten reforma në sistem pensional për të bërë liberalizim të shtyllës së dytë. Kjo do ta zvogëlonte mundësinë për humbje në Trust”, tha Gashi.

Sa i përket Bankës Qendrore, Gashi ngriti shqetësimin për vonesën e emërimit të Guvernatorit në këtë institucion. Sipas tij, këto veprime të Qeverisë janë të pafalshme sepse rrezikojnë tejmase stabilitetin financiar dhe rrjedhimisht ndikojnë direkt në ekonominë e vendit.

“Në vend që të merren masa emergjente për mbrojtje të mirëqenies së qytetarëve, po merren masa për rëndimin e kësaj gjendje. Qytetari po vaŕfërohet çdo ditë e më shumë”, shtoi ai, duke iu referuar rritjes së çmimit të energjisë dhe të tatimit në pronë./21Media